कौटुंबिक वादातून जावयावर जीवघेणा हल्ला; नाकाचे हाड फ्रॅक्चर

पुण्यातील कोंढवा परिसरात कौटुंबिक वादातून धक्कादायक घटना उघडकीस आली आहे. पत्नी आणि मुलाला भेटण्यासाठी सासरी गेलेल्या जावयावर मेव्हण्यासह सासरच्या नातेवाईकांनी हल्ला केल्याचा आरोप असून, या हल्ल्यात त्याच्या नाकाचे हाड फ्रॅक्चर झाले आहे.

ही घटना कोंढव्यातील मिठानगर परिसरात घडली. तक्रारदार रिझवान राजअहमद शेख हे पत्नी आणि मुलाला भेटण्यासाठी सासरी गेले असता, जुन्या कौटुंबिक वादाच्या कारणावरून सासरच्या नातेवाईकांनी त्यांच्याशी वाद घालत शिवीगाळ केल्याचा आरोप आहे.

त्यानंतर रिझवान शेख तेथून निघून आल्यानंतरही आरोपींकडून त्यांना फोनवर शिवीगाळ करण्यात आली. याचा जाब विचारण्यासाठी ते पुन्हा सासरी गेले असता, मोईन अकबर खान याने हातातील लायटरने त्यांच्या नाकावर व डोक्यावर हल्ला केल्याचे तक्रारीत नमूद करण्यात आले आहे.

या हल्ल्यात रिझवान शेख यांच्या नाकाचे हाड फ्रॅक्चर झाले असून ते गंभीर जखमी झाले आहेत.

या प्रकरणी अकबर खान, अकबर युसूफ खान आणि मोईन अकबर खान यांच्याविरुद्ध कोंढवा पोलीस ठाण्यात गुन्हा दाखल करण्यात आला आहे. पोलीस पुढील तपास करत आहेत.

📰 Pune Tak News “सत्याची लेखणी… जनतेचा आवाज!”